A Hora Charrante 30 Zaguer Programa

pegallo

Ola ola!! Y… adiós adiós!

Ascuita o zaguer programa AQUÍ

Sí, asinas ye, iste ye estau o nuestro zaguer programa. Ibanos a fer un especial de dos horas, pero a la fin se nos embolicó a cosa y rematemos fendo-ne un de 3!

Poco tenemos que explicar d’iste programa, lo faciemos con toda a ilusión, con un amiro de convidadas y familia que ha quiesto estar con nusatras en iste zaguer programa.

Deixamos dezaga muitas memorias, todas buenas, a-saber de ratos de risas, refirme a luitas socials y cultura variopinta. Pero o millor de tot, ye l’empare de toda la chent que ye dezaga de nusatras, asperando totz os mierques o programa o la chent que nos ascuitatz mientres leyetz istas linias.

Solament podemos agradeixer a todas istos 30 programas que con tantisma ilusión hemos feito pa pasar-lo de bitibomba con vusatras y entre nusatras.

Salut, y dica siempre!

Anuncios

A Hora Charrante 29

pegallo

Ola ola!

Aquí tenemos o debantzaguer programa (Oooohhh!). Ascuita-lo AQUÍ

Ahiere teniemos a cutiana noticieta, que a la fin esbarró en una demanda de virolla y esbarres diversos, que a la fin remató con a estrelar amaneixedura d’un buen colega que se fació decir “Telebrenda”, asinas que de fambre no’n pasemos mica!

Tamién, como convidau teniemos a Chorche, colaborador de Softaragonés, que nos contó un poquer o treballo que fan con todas as ferramientas que creyan pa poder fer servir l’aragonés con as nuevas tecnolochías y que tan buena honra nos ne fan a las que las femos servir!

Y prou, desfrutatz o programa, que isto se remata la semana venient!

Salut!

A Hora Charrante 28

pegallo

Ola ola!!

Aquí ye o programa d’ahiere! Ascuita-lo AQUÍ

No tenemos guaire que explicar-tos d’iste programa, ahiere estión con nusatras en a radio a chent de Vergüenza Ajena, programa que se fa os sabados de nueitz en Radio La Granja, radio libre de Zaragoza, que fa poco cumplió o suyo 30eno cabo d’anyo. Les faciemos unas pruebas pa veyer si yeran aptos pa fer o programa con nusatras, y prou que sí, estión aptos!

Tamién teniemos a Diego, coorganizador d’o concierto de Los granadians del espacio exterior, que se ferá o sabado 27 de Chunyo en a Sala López de Zaragoza, nos contará un poquer acerca d’ista banda granadina y toda a info d’o concierto!

Salut!

A Hora Charrante 27

pegallo

Ola ola!!

Ya somos aquí atra semana como por un regular con o programa 27. Ascuita-nos AQUÍ

Ista vegada, pa no cambiar a rutina, teniemos a noticieta, que ista vegada, estoi que ye a noticia más seriosa que nunca no hemos feito, asinas que ascuitatz-la bien, que imos en serio ista vegada!

Y tamién, si no querebatz entrevistas, pues tiene-ne dos! Teniemos en os estudios a Quique León, de Lemoncut, director y guionista de cine en cintas como Justi&Cia u bells curtos dirichidos por ell. Nos contará un poquer en qué consiste o suyo treballo y como ye a situación d’o cine en l’estau.

Y por atra man, teniemos a Víctor, de Towanda, que ye organizando Zinentiendo a X Muestra internacional de cine de tematica LGTB, nos explicará un poquer qué ye ixo de Zinentiendo, nos contará un poquer tot o treballo que bi’n ha per dezaga d’a muestra, que no’n ye poco y tamién, prou que sí, a programación que ya prencipió o 29 de Mayo y rematará o 18 de Chunyo.

Sin más, trancatz a mente, y ascuitatz-nos!

Salut!

A Hora Charrante 26

pegallo

Ola ola!!

26eno podcast d’A Hora Charrante (Charrante!). Ascuita-lo AQUÍ

En iste programa podretz ascuitar a cutiana noticieta, que antimás, ista vegada, o nuestro equipo d’investigación, no ha habíu de ir-se-ne muit luen, solament ta Samianigo, y con tot y con ixo, se i trafucoron… Bien se vale que teniemos remedio pa tot en iste programa.

Tamién, Edu, de Cintas d’Enguero nos trayó una nueva cinta, Trainspotting, una choya d’o cine, que agora tiene o suyo trocet en aragonés, como be d’estar!

Y pa rematar, en a segunda parte d’o programa, i teniemos a Armando y Laura, parte d’a organización d’o festival Esfendemos a Tierra, que se celebra en Artieda os días 17, 18 y 19 de Chulio. Ista anyada vien pisando con rasmia con un cartel d’artistas bien pincho y que ferá as delicias de todas as que i sigamos!

Salut!

A Hora Charrante 25 “Especial Feminismo”

especial feminismo

Ola ola!!

Ya hemos cumpliu 25 programas, ya pa celebrar-lo, aquí tos trayemos un especial de dos horacas! Ascuitatz-lo AQUÍ

En a primera parte, podretz ascuitar un especial sobre feminismo an que Irene, Cris, Tamara y Laura, as nuestras convidadas, tos contarán un poquer sobre aspectos d’o feminismo como a violencia contra as mullers republicanas en a guerra civil y post guerra, os estereotipos d’as mullers, a luita feminista en as aulas u os micromasclismos, ixos detalles que pareixen chicorrons pero no lo son tanto.

Y en a segunda parti, especial somardismo, dimpués d’a luita, qué millor que fer-se unas risetas. I teniemos a cutiana noticieta, charrando d’un estudeo muit serioso, tanto o más que o nuestro equipo d’investigación.

Tamién, en o programa d’ahiere, i teniemos un especialaco de A verdat dezaga d’os artistas con o granizo Luis Cobos, que resulta que tamién ye d’Aragón!

Y pa rematar, o nuestro compa Edu, nos traye en Cintas d’Enguero una cinta somarda no, o venient. Nos trayó a o “O choven Frankenstein”, que tos deixará fendo cruces!

Por a resta, asperamos que tos faiga goi o programa!

Salut!!

A Hora Charrante 24

pegallo

Ola Ola!!

Ya somos aquí, con o programa d’o mierques! Ascuita AQUÍ o podcast!

En iste programa, tos charremos en a noticieta d’un invento que ye revolucionando o gaseoso mundo d’as flatulencias, pedos o como más tos estimetz de decir-ne.

Una ascuitanta nos ninvió una versión d’o S’ha feito de nueit cantada por ella que nos deixó emocionadas! Muitas gracias!

En a segunda parti d’o programa, Edu nos trayó, aprofitando o tiempo electoral, as campanyas electorals más… más… por decir bella cosa, curiosa, y pa rematar a sección, ascuitemos un trocetz d’a suya zaguera Cinta d’Enguero, que tamién va por istos temas.

Tamién, tos anunciemos, que o venient mierques, día 27 de Mayo, feremos un especial de dos horas, feminismo y somardismo, a partis iguals!

Salut!

A Hora Charrante 23

pegallo

Ola ola!

Ya somos aquí atra vegada, empachadas y farchas de fatezas y chorradas! AQUÍ tiens o podcast!

En iste programa, que s’emitió ahiere día 13, tos trayemos a cutiana noticieta, con l’alcalde de Vitoria-Gasteiz como protagonista y a suya graniza tortilla de trunfas a “pufo”.

Tornó t’as ondas libres Sopetas de Poetas con una autora aragonesa que se diz Victoria Nicolás y a nuestra compa Laura, nos contará un poquer d’a suya vida y nos leyerá bells poemas suyos.

Y en a segunda parte d’o programa teniemos con nusatras a la chent d’o Taller de cuida­dos y análi­sis de tex­tos fem­i­nistas, que son fendo unas cafetas activas os chueves en o CSO Kike Mur bien pinchas a las que podretz acudir-ie dica o día 28 de Mayo. Tos convidamos a ir-ie y participar-ie!

Sin más dilación, tos deixamos con o programa. Salut!

A Hora Charrante 22

pegallo

Ola ola!

Con un poquer de retardo, pero ya ye aquí o programa d’A Hora Charrante d’iste mierques zaguer! Ascuita-lo AQUÍ

Ista vegada, i teniemos a cutiana noticieta, charrando d’una antiga lei islandesa que permitiba matar vascos y que se viedó fa poco. Prebemos de gritar a un numer a l’azar a veyer que que opinaban sobre isto pero no bi hubió suerte…

Tamién, en a misma noticieta, teniemos o zaguer treballo de Cintas d’Enguero. A noticieta más famosa d’os 90, José Toxeiro y a suya droja en o Mañocao.

En a segunda parti d’o programa, podretz ascuitar un Dossier al Doquier, adedicau a o gran Eduardo Galeano, que tristement morió fa poco y nos deixó con una gran tristura.

Sin más, asperamos que tos faiga goi!!

Salut!

A Hora Charrante 21

pegallo

Ola ola!

Ya somos aquí atra vegada con o zaguer programa! Podetz ascuitar-lo AQUÍ

Ahiere teniemos a visita de Silvia y Carlos, Silvia ye a creyadora d’una nueva canal de Youtube que se diz A Escuchetes, una canal an podretz trobar recetas, consellos y muitas cosetas más que tos ferán firme honra, de raso en aragonés, prou que sí! Carlos ye un alumno d’os cursos d’aragonés d’a universidat, organizaus por o sendicato d’estudiants Seira, nos contó un poquer como plegó a conoixer istos cursos y tamién nos contó sobre a suya exposición de cuadros que podretz veyer en A Flama, no deixetz de ir-ie a veyer-la, que tos ferá a saber-lo qué goi!

Tamién teniemos a cutiana noticieta, que resulta que un tal Antonio Crematot, pretó fuego a un buzón de Correos porque no le plegaban as cartas ni os paquetz, asinas que decidió que “Si a yo no me’n plegan, a la resta tampoco” y plum, fuego.

Tamién o nuestro compa Edu, paró una nueva sección de “inte tenient”, an que ascuitemos como os artistas fican mensaches subliminals en aragonés en as suyas cantas rematando con una sospresa que deixó a control fendo uellos de caparra, no tos la perdatz!

Salut!